ROXAS CITY – Ginransak sang wala pa matumod nga mga suspek ang 6 ka mga classrooms sang Pontevedra Elementary School, kagab-i, Mayo 21.
Sa inisyal nga impormasyon nga nakuha sang Bombo Radyo sa staff sang nasambit nga buluthoan, natukiban na lang kaina sang aga nga bukas na ang mga classrooms kag guba na ang doorknobs nga nagakahulugan nga pwersahan ini nga ginbuksan kag nagalalapta nga kagamitan.
Mahibaluan nga ang mga classrooms ang nahamtang sa natago nga lugar kag nalikod nga bahin sang stadium.
Sa pagtsekyar sang staff, wala na sa classrooms ang pila ka kagamitan kaangay sang heater kag wall clock.
Samtang, nakit-an man sa guwa sang classroom ang duha ka standing fan nga posible nabilin sang suspek.
Nagapadayon naman ang imbestigasyon sang kapulisan angut sa insidente.
