ROXAS CITY – Wala pa makapili ang alkalde sang Panay sang masunod nga mga department heads sa anum ka nagkalain-lain nga departamento sa ila munisipyo.
Ini ang ginpahayag ni Mayor Vicente ‘Vic’ Bermejo, sang mainterview sang Bombo Radyo.
Suno sa alkalde, sumugod sang nagresign ang mga empleyado kadungan sang pagtapos sang nagligad nga administrasyon, wala pa mapahamtangan sang pinuno ang mga opisina sang engineering, planning, MENRO, GSO, assessor kag ang isa pa ka departamento nga nalimtan sang alkalde nga i-mitlang.
Dugang pa sini nga nagapadayon ang iya nga pagsala sa igapahamtang sa amu nga mga posisyon bangud dako ang mangin responsibilidad sang isa ka department head.
Aminado ang alkalde nga madamo sang indi qualified nga empleyado ang nagatrabaho sa ila munisipyo.
Bukas man suno kay Bermejo ang ila munisipyo sa mga outsiders ukon indi taga-Panay nga mag-apply, basta mga kwalipikado lamang.
