Pilas ang naangkon sang 6 tanan ka mga sakay sang duha ka motorsiklo nga aksidente nga nagbungguanay sa Barangay San Nicolas, Pilar Capiz.
Ginkilala ang driver sang Euro 150 kay alyas Vince, sakay ang iya nga asawa kag 9 ka bulan nga bata, samtang ginkilala naman kay alyas alyas Cherlene ang driver sang Click 125, angkas man ang duwa sini ka mga abyan, kag lunsay mga residente sang nasambit nga banwa.
Sa interview sang Bombo Radyo kay PSSG. Jay Pee Tomogda -Imbestigador sang Pilar Municipal Police Station, ginapahayag nga nagasundanay ang duha ka mga motorsiklo, apang sang tuyo tani nga magliko padulong sa wala nga bahin sang dalan ang motorsiklo nga ginamaneho ni alyas Vince, hinali ini nga na-sideswipe sang nagasunod nga motorsiklo nga ginamaneho ni alyas Cherlene nga angkas ang duha ka mga abyan.
Dugang pa sini, bangud sang pagkatumba, lunsay nag-angkon sang mga pilas sa lawas ang magkatuhay nga bahin.
Gilayon naman nga ginpadangat sa pinakamalapit nga ospital ang mga persona nga nagkalapilasan agud madapatan sang nagakaigo nga pagbulong.
Sa karon, yara na sa kustodiya sang Pilar Municipal Police Station ang duha ka mga motorsiklo para sa nagakaigo nga disposisyon, samtang nagapabilin pa sa ospital si alyas Vince para sa padayon sini nga pagbulong.
