ROXAS CITY-Nagpositibo sa Coronavirus Disease ukon COVID-19 ang anom ka miyembro sang pamilya sang isa ka negosyante nga una na nagposito sa amo nga balatian sa Sitio Kagitingan, Barangay Cagay, Roxas City.
Ini ang ginkompirmar mismo ni City Mayor Ronnie Dadivas sa iya nga official statement pinaagi sa iya nga facebook post.
Suno kay Dadivas nga apat ka mga anak sini nga lalaki, asawa kag umagad nga babayi ang nagpositibo sa COVID-19 matapos nga ginpaidalom sa Real-Time Polymerase Chain Reaction ukon RT-PCR Test.
Mahibaluan nga una na ginpaidalom ang mga ini sa strict home quarantine sadtong Agosto 16.
Samtang, ginpasarado naman sang nasambit nga alkalde ang Burgos Talipapa kun sa diin nagabaligya ukon nakapadulong ang mga nagpositibo.
Magluwas diri, ginpaidalom man sa lockdown ang Sitio Kagitigingan, Barangay Cagay sining siyudad kun sa diin nagapuyo ang mga nagpositibo agud nga malikawan ang paglapta sang nasambitan nga virus.
