ROXAS CITY – Na-rescue sang Philippine Coastguard ang anum ka persona matapos maguba ang makina sang pump boat sa tunga sang kadagatan sa Barangay Olutayan, Roxas City.
Sa interview sang Bombo Radyo Roxas kay Lt. Commander Micheal Andag, station commander sang PCG-Culasi, ginpahayag sini nga nagpadulong sa ila talatapan si Joel Soriano sang North Panay Pilot, para ipalab-ot ang pagpangayo sang bulig ni Ovelyn Vasquez, tag-iya sang pump boat kag isa sa anum nga nakasakay.
Gilayon nga gintawagan sang PCG-Culasi ang ila nga sub-station sa Barangay Olutayan para una nga magpatigayon sang rescue operation samtang nagapreparar sila.
Apang bangud sa mabaskog nga balud, wala nasarangan sang bangka nga ginsakyan sang mga personnel sa sub-station sa Olutayan rason nga nagbalik na lamang sila.
Sa bulig sang FB Brylle nga gingamit sang PCG-Culasi na-rescue ang mga biktima nga sanday Ovelyn Vasquez, anak nga si Elson Vasquez, abyan nga si Velfa de la Cruz, Raymark Toledo, Rodrigo Aguilar kag ang boat captain nga si Joselito Tepacia alyas Jong Jong nga nagapalangurog pa sang ila maabtan bangud nabasa ang mga ini sa dalagkuan nga mga balud nga nagahampak sa ila nga bangka.
Nahibaluan nga indi sa Barangay Olutayan na-rescue ang anum ka mga biktima kundi sa Sapatos Gamay Island, matapos nga gin-anod sang mabaskog nga balud.
Samtang, nagguwa sa imbestigasyon sang PCG nga nagapauli na ang mga biktima gikan sa ila nga pagtesting sa makina sang ginbakal nga pump boat sang maaberiya ini sa tunga sang kadagatan tobtob maguba ang isa ka katig sang bangka bangud sa paghampak sang dalagkuan nga mga balud.
