CAPIZ – Natalana nga sunugon ang 6-M nga official ballot nga una na nga gin-imprinta sang Commission on Election (Comelec) para kuntani sa palaabuton nga eleksyon 2025.
Ini matapos nagpaguha sang Temporary Restraining Order (TRO) ang Korte Suprema sadtong Biyernes Enero 17, 2025, batuk sa desisyon sang ahensya nga pagdeskwalipika sa pila ka mga kandidato para sa national kag local elections.
Sa interview sang Bombo Radyo kay Commission on Election (Comelec) Assistant Regional Director nga si Atty. Wil Arceño, ginpahayag sini nga ini bangud indi na mapuslan kag magamit pa ang amu nga mga balota.
Suno kay Atty. Arceño, ini ang una nga bes nga ginhimo sang komisyon kung sa diin ang tanan nga mga pagpreparar may kaangtanan ang balota maapektuhan bangud sa pagpauntat sa pag-imprenta.
Mahibaluan nga naglab-ot sa kapin P120-M ang nausik nga kwarta para diri kung sa diin ang isa sini nagabalor sang tig-P22.00 kada isa.
Sa nasambit nga pagbag-o sang pag-imprenta kalakip sa mga kinahanglan nga bag-uhon amu ang Election Management System, database sang komisyon, serialization sang kada pangalan sa balota subong man ang bag-o nga ballot face template.
Posible man suno sa Assistant Regional Director nga maatrasar ang mock elections nga matabo kuntani subong nga adlaw Enero 18 kung sa diin gin-atras sa Enero 25 agud makahatag pa sang oras sa pag-imprenta sang balota.
