PILAR CAPIZ – Pilas sa mata ang naangkon sang 6-tuig nga bata nga lalaki, matapos ginapahayag nalukpan sang boga sa Barangay Monteflor, Pilar Capiz.
Sa interview sang Bombo Radyo sa imbestigador sang Pilar Municipal Police Station nga si Police Staff Sergeant Jaypee Tomogda, ginpahayag sini nga samtang naga hampang ang biktima kaupod ang iya sini kahampang gintestingan sini nga lantawon ang sulod sang boga bangud ginapahayag nga wala ini maglupok.
Apang matapos ang pila ka beses nga pagpindot sini, aksidente ini nga naglupok kag nag-igo sa iya mismo nga mata.
Suno kay Tomogda, matapos ang insidente madasig nga ginpadangat sa ospital ang biktima agud hatagan sang nagakaigo nga pagbulong.
Sa karun yara na sa istable nga kondisyon ang biktima samtang yara naman sa paghinakop sang Pilar MPS ang boga para sa nagakaigo nga disposisyon.
Panugyan sang imbestigador sa publiko ilabi na nga nagahilapit na ang bag-ong tuig, likawan nga magamit sang anu man nga sahi sang palupok agud malikawan ang kasubong sini nga mga insidente.
