Maluwas sa nagabaskog nga sentimyento sang publiko tuhoy sa indi maayo nga peace and order situation sa pungsod sa karon, suportado man sang datos ang positibo nga impact nga gintuga naman sang kampanya kontra droga sang nakaligad nga Duterte administration.
Ini ang ginalauman sang Senate Resolution number 12-17 nga ginfile kahapon ni Senator Christopher Bong Go agud imbestigahan sa Senado ang war on drugs sang nakaligad nga adminitrasyon.
Nakasaad sa resolution nga out of 42,000 nga mga baranggay sa bilog nga pungsod, masobra 24,000 ang nangin drug-free bangud sa matindi nga anti-illegal drugs operation ni anay Presidente Duterte.
Naglab-ot naman sa P76 Billion ang balor sang iligal nga droga na nakumpiska sang mga otoridad sang nakaligad nga administrasyon. Halos 15,000 drug personalities kag mga sindikato naman ang nadakpan bangud sa intensified drug operations sadto.
Bangud nagin maukoy ang mga komunidad, 79% ukon walo sa kada pulo nga Pilipino ang satisfied ukon sang-ayon sadto sa war on drugs ni Presidente Duterte.
Suno kay Senator Bong Go, pila lamang ini sa mga datos nga importante nga usisaon sa panukala nga imbestigasyon sang Senado.
Ginapahayag nga kinahanglan man mahibaluan kun ano nga aspeto sang drug war ang posible nga maipatuman sa karon agud mabalik ang anay peace and order sa pungsod.
Nauna na nga ginsiling ni Go nga naintindihan sini ang himumun-ot sang publiko nga nagalaum nga mabalik ang anay matawhay nga mga komunidad.
