ROXAS CITY – Naglab-ot sa kapin 602 ka mga vehicular accidents ang nabalhag sa Capiz halin Enero tubtob Mayo sini nga tuig suno sa Capiz Police Provincial Office.
Sa interview sang Bombo Radyo kay CPPO Spokesperson PCAPT Merry Chris Dela Cruz, iya ginpahayag nga sa nasambit nga numero sang vehicular accidents, 15 na ka indibidwal ang ginbawian sang kabuhi.
Suno kay Dela Cruz, ang masami rason sa disgrasya sa dalanon amo ang self inflicted, head on collision, yara sa impluwensya sang makahulobog nga ilimnon ang driver kag may ara man purely accident bangud sa guba nga dalan kag kun kaisa kulang sa edukasyon ukon seminar ang iban nga driver.
Dugang pa sini nga kalabanan mga motorsiklo ang nagakaulamid sa aksidente.
Panugyan ni Dela Cruz sa mga motorista nga maghalong kag teksyaron ang salakyan kag kaugalingon kun makasarang pa magmaneho agud malikawan ang mga disgrasya kag indi pagkalipatan nga i-observe ang BLOBAGETS ukon ang Battery, Lights, Oil, Water, Brake, Air (tires), Gas, Engine, Tire, and Self (driver’s condition).
– With a report from Bombo Jessa Mae De Los Santos
