ROXAS CITY – Ginkumpirmar ni Vice Governor James ‘Mitang’ Magbanua nga nabaton na sang 61 ka mga Gugma Scholars ang ila educational assistance.
Sa interview sang Bombo Radyo sa bise gobernador, makabig suno diri nga special case ini nga releasing, bangud ini sila ang nabilin nga scholars ni former 2nd District Congressman kag sa karon Governor ‘Oto’ Castro sa banwa sang Dao, nga nadula ang ila pangalan sa listahan.
Apang, naghinyo ang mga ini kay Magbanua, kag natigayon nga na-releasan sang P5,000 kada estudyante sa kada semester, nga nagikan tanan sa pribado nga eskwelahan.
Ginpahayag nga nadula ang ila mga pangalan sa listahan bangud sa posible wala makapasar sa rekisitos.
Apang, sa karon, ginahinyo lamang sang gobernador, suno kay Magbanua nga mangin maayo nga estudyante ang mga scholars.
Ginklaro sang bise gobernador nga nagatulay lamang ini kag nagasuporta sa amu nga programa kag lain ini nga scholarship program sa probinsya, kun sa diin ginapangunahan sang chairman sang komitiba ni board member Thea Faith Reyes nga sa karon, ginatun-an kag ginaplastar ang ordinansa nga gindihon sang board member, agud indi maabusuhan.
