ROXAS CITY -Pilason ang 63-anyos nga babayi matapos nga ginaalegar aksidente nabungguan sang motorsiklo samtang nagalakat sa karsada sang Barangay Bailan, Pontevedra Capiz.
Ginkilala ang biktima nga si Mary Ann Bechayda, 63-anyos sang nasambit nga lugar.
Base sa inisyal nga imbestigasyon sang Pontevedra Municipal Police Station nga samtang nagalakat sa dalanon si Bechayda, ginaalegar nga aksidente na lamang ini nga nabungguan sang motorsiklo nga ginameho naman ni Hipolito Fuentes, 26-anyos sang Barangay Bailan, Pontevedra, Capiz.
Bangud diri, nag-angkon sang pilas sa magkatuhay nga porsyon sang lawas si Bechayda nga gilayon naman gindala sa isa ka pribado nga ospital sa siyudad agud dapatan sang nagakaigo nga pagbulong.
Samtang, gilayon naman ginkustodiya sa Pontevedra Municipal Police Station si Fuentes para sa nagakaigo nga disposisyon.
