Posible nga maapektuhan ang kapin sa 63 million ka mga commuters kada tuig nga nagagamit sang EDSA Busway kon indi mahatagan sang pondo ang proyekto sa 2027.
Suno kay Acting Transportation Secretary Giovanni Lopez, kinahanglan sang Department of Transportation ukon DOTr ang 1.756 billion pesos nga pondo para sa pagpadayon sang EDSA Busway Project.
Sa hearing sang Senate Subcommittee on Finance, ginpahayag ni Lopez nga sobra 60 million ka mga pasahero ang naggamit sang EDSA Busway sang 2025.
Ginapaabot man nga magaabot sa 63 million kada tuig ang mga commuter nga magadepende sa amo nga transportasyon.
Kon wala sang pondo, posible nga madelay ang mga proyekto para sa pagpaayo sang mga busway station, lakip na ang pag-install sang mga elevator para sa mga senior citizen kag persons with disabilities ukon PWDs.
Posible man nga maapektuhan ang pagmaintain sang kalimpyo kag seguridad sa mga istasyon.
Samtang, ginapatigayon karon sang DOTr ang rehabilitation sang mga istasyon sa Bagong Barrio, Balintawak kag Guadalupe.
Magapatindog man ang ahensya sang bag-o nga mga istasyon sa Cubao, Magallanes kag PITX.
Una na nga ginpahayag sang DOTr nga zero allocation ang ginhatag sa EDSA Busway Project para sa 2027 bangod sa limitado nga fiscal space sang gobyerno.
Wala man sang allocation para sa Service Contracting Program kag Fuel Subsidy Program, nga pareho may ginapangayo nga 5 billion pesos nga pondo sang DOTr.
Samtang, ginatantya sa 300.96 bilyon pesos ang proposed budget sang Department of Transportation para sa 2027.
