ROXAS CITY – Padayon nga ginabulong sa Roxas Memorial Provincial Hospital ang isa ka 64-anyos nga mangunguma matapos nga ginaalegar ginlabo sa Barangay Burias, Mambusao, Capiz.
Ginkilala ang biktima nga si Roger Dela Cruz sang nasambit nga lugar.
Base sa inisyal nga imbestigasyon sang Mambusao Municipal Police Station nga samtang nagapahalab sang karabao si Dela Cruz hinali na lamang nga nagpalapit sa iya ang suspek nga si Joelito Candelario 33-anyos sang amo man nga lugar kag ginaalegar ginlabo ang biktima.
Apang, hugot naman nga ginpanginwala ni Candelario ang nasambit nga alegasyon batuk sa iya.
Suno kay Candelario nga lab-on ini kuntani ni Dela Cruz gamit ang sanduko apang gin-agaw niya ini rason nga nalabo sini ang biktima.
Bangud diri, nag-angkon sang mga pilas sa kamot ang biktima nga gilayon naman gindala sa Mambusao District Hospital apang gilayon man ginsaylo sa nasambit nga ospital sa siyudad sang Roxas.
Sa karon, nakahunong na sa karsel sang Mambusao Municipal Police Station ang nasambit nga suspek kag natalana nga pasakaan sang nagakaigo nga panumbungon.
