ROXAS CITY – Pilason ang isa ka 65-anyos nga mangunguma matapos nga ginaalegar ginlabo sa Barangay Duran, Dumalag, Capiz.
Ginkilala ang biktima nga si Nelson Frac kag residente sang Barangay Poblacion sang nasambit nga banwa.
Base sa inisyal nga imbestigasyon sang Dumalag Municipal Police Station nga samtang nagaistorya ang biktima kay John Jacinto hinali na lamang ini nga ginsumbag sang makaduha ka beses sang suspek nga si Jessie Lovariza 48-anyos sang Barangay Duran.
Magluwas diri, ginaalegar nga naggabot pa sang binangon sa iya nga kilid ang suspek kag ginlabo ang nasambit nga biktima.
Bangud diri, nag-angkon sang pilas sa ulo si Frac nga gilayon naman gindala sa Tapaz District Hospital apang gilayon man nga ginsaylo sa pribado nga ospital diri sa siyudad sang Roxas para sa nagakaigo nga pagbulong.
Samtang, boluntaryo naman nga nagsungka sa mga kapulisan ang suspek matapos ang natabo.
Ginapatihan nga posible daan nga hiligut-anon ang motibo sang nagluntad nga krimen.
