ROXAS CITY – Nangin madinalag-on ang ginpatigayon nga turn over ceremony sa pag-abot sang Sinovac vaccines para sa mga medical frontliners sang Roxas Memorial Provincial Hospital.
Gintambungan ang nasambit nga aktibidad ni Capiz Governor Esteban Evan Nonoy Contreras II, Dr. Joy Castroverde- Capiz Representative, DOH-6.
, Dr. Alex Nolasco sang PHO, Dr. Edmarie Tormon-OIC Chief of Hospital sang RMPH, Provincial Administrator Dr. Chinel Monares kag iban pa.
Ginpahayag ni Dr. Nolasco kapin sa 650 doses sang Sinovac vaccine ang nag-abot sa probinsiya nga santu sa amo nga numero sang mga resipyente nga magabaton sang bakuna nga gikan sa China.
Ginpasalamatan naman ni Governor Contreras ang gobyerno nasyunal sa pihak nga wala malakip sa prioritized province ang Capiz bangud gamay lamang ang kaso sang covid-19 naka-ambit ini sang bakuna para mahatagan ang mga medical frontliners sang RMPH.
Ginpasiguro man sang gobernador nga may masunod pa nga batch sang bakuna nga magaabot sa masunod nga mga inadlaw.
Ginpahayag naman ni Dr. Castroverde nga sa kapin 10mil 400 ka mga vaccines ang nag-abot sa Isla sang Panay, 6 lamang ka mga ospital nga may yara sang madamo nga mga kaso sang covid-19 ang ginpa-inan sang nasambit nga bakuna.
Apang bangud may sobra sa sinovac vaccine, sa nakita nga kahandaan sang probinsiya nga batunon ang nasambit nga bakuna, natigayon ini nga mapainan.
Ginpalab-ot man sang mga opisyal ang ka-importansiya sang bakuna, agud maprotektahan ang kaugalingon.
Gina-una ang mga medical frontliners sang RMPH bangud bilang referral hospital sang Covid-19, sila ang nagatatap sang mga pasyente nga nagapositibo sang nasambit nga balatian.
Samtang kalakip man sa ginahatagan prayoridad nga mahatagan sang bakuna ang naga-edad sang 60-anyos pataas.
