ROXAS CITY – Wala na sang kabuhi sang nasapwan ang isa ka 66-anyos nga mangunguma sa iya ulumhan sa Barangay Sta Cruz, Ivisan, Capiz.
Ginkilala ang biktima nga si Bernardo Once sang nasambit nga lugar.
Base sa inisyal nga imbestigasyon sang Ivisan PNP sa pagpanguna ni Police Staff Sergeant Emilio Ubalubao nga nasapwan na lamang sang pila ka mga pumuluyo nga wala na sang kabuhi ang biktima.
Bangud diri, gilayon nga nagtawag ang pila ka mga opisyales sang barangay sa mga kapulisan.
Nahibaluan nga nagaisahanon lamang ang biktima sa sulod sang iya balay bangud ginapahayag nga yara sa Metro Manila ang iya mga himata.
Magluwas diri, ginapahayag nga yara sa idalom sang impluwensya sang makahulubog nga ilimnon ang biktima antes natabo ang insidente.
Igapaidalom naman sa post mortem examination ang bangkay sang biktima matapos nga may yara sang nakita nga mga lagob sa nawong sini.
Sa karon, yara na sa punerarya ang bangkay sang amo nga biktima.
Samtang, nagapadayon naman ang imbestigasyon sang mga kapulisan sa nagluntad nga insidente.
