Isa ka importante nga tikang para sa pagpreserbar sang peace and order sa banwa sang Pontevedra, Capiz ang madinalag-on nga pagpatigayon sang Project CAPeace-Tawhayan: Simultaneous Surrender of Loose Firearms Campaign.
Nagdala ini sa boluntaryo nga pagsurrender sang 66 ka loose firearms halin sa nagkalain-lain nga barangay sa Pontevedra.
Suno sa Pontevedra Municipal Police Station, indi lamang ini accomplishment sang kapulisan, kundi resulta man sang pagbinuligay, pagsalig kag aktibo nga pagpakigbahin sang mga Barangay Captain, barangay officials kag mga residente sang banwa.
Sa 66 ka armas nga ginsurrender, 32 ang long firearms kag 34 ang short firearms. Boluntaryo ini nga ginsurrender sang mga indibidwal nga nagpili nga magpakigbahin sa programa para sa mas luwas, malinong kag matawhay nga komunidad.
Bilang suporta sa kampanya batuk sa loose firearms kag sa pagmintinar sang seguridad sa komunidad, naghatag sang cash incentives si Municipal Mayor Hon. Henry D. Tumlos sa tatlo ka barangay nga may pinakadamo nga loose firearms nga ginsurrender.
Nakuha sang Barangay Tacas ang ikatatlo nga pwesto matapos makasurrender sang lima ka loose firearms, samtang Barangay Jolongajog ang ikaduha nga pwesto bangod sa 11 ka loose firearms nga ginsurrender.
Ang Barangay San Pedro naman ang nagkuha sang una nga pwesto matapos makarecord sang 12 ka surrendered loose firearms.
Ang paghatag sang cash incentives isa ka pagkilala kag suporta sa aktibo nga pagpakigbahin sang mga barangay sa kampanya batuk sa loose firearms.
Ginalauman man ini nga makahatag sang inspirasyon sa iban pa nga barangay kag mga residente nga magbuligay sa mga otoridad kag magsuporta sa mga programa para sa mas luwas kag malinong nga komunidad.
Indi lamang simple nga pagsurrender sang armas ang buot silingon sang 66 ka loose firearms.
Nagapakita ini sang pagsalig, pagbinuligay kag pagpili sang pumuluyo para sa kalinong.
Ang boluntaryo nga desisyon sang mga nagapanag-iya ukon nagahupot sang loose firearms nga isurrender ini nagapakita sang ila pagpakigbahin sa mga programa para sa peace and order sang PNP kag sa kolektibo nga responsibilidad sang komunidad para sa mas luwas nga Pontevedra.
