ROXAS CITY – Nagakulob kag wala na sang kabuhi sang nasapwan ang 68-anyos nga mangingisda sa kilid sang baybayon sa Sitio Culasi, Barangay Lonoy, Sapian, Capiz, alas-7 kaina sang aga.
Ginkilala ang biktima kay Lorito Torres, residente sang amu man nga lugar.
Sandig sa inisyal nga imbestigasyon sang katapo sang Sapian MPS, nga ginpangita ang biktima halin pa kagab-i bangud wala na makapauli sa iya balay.
Katapusan ini nga nakit-an mga alas-4 sang hapon kahapon nga adlaw, nga nagapamunit.
Ba-se sa imbestigasyon sang mga kapulisan, nga posible samtang nagalakat papuli ang biktima nadalin-as ini pa baybay kag lumampos sa bato ang iya ulo nga gintunaan sang pagkalipong, bangud sa nakita nga pilas sa iya ulo.
Nahibaluan nga mataas ang tubig ukon hightide ang amu nga baybayon kagab-i.
Wala sang asawa kag bata ang amu nga biktima.
Nagapati man ang iya himata nga wala sang foul play sa kamatayon sang biktima.
Sa karon, yara na ang bangkay sini sa punerarya.
