ROXAS CITY – Wala napunggan sang pamilya Logo ang ila balatyagon matapos angut sa natabo sa ila nga amay matapos nga ginpabay-an kag una na ginbalibaran nga i-admit sa Mambusao District Hospital.
Sa interview sang Bombo Radyo kay Jenny Logo nga indi sini mabaton ang ginhimo sang nasambit nga ospital matapos nga ginbutang sa peligro ang kabuhi sang ila amay nga si Johnny Logo sang Barangay Atiplo nga may yara sang ginasuprehir nga balatian.
Suno kay Logo nga adlaw sang Domingo, Setyembre 27 ginbilin sang ila iloy nga si Wenefreda Logo ang ila amay agud nga magpanindahan.
Apang, wala ginalaoman nga gin-atake ini sang iya ginasuprehir nga balatian partikular na ang tumor sa iya tutunlan nga yara na sa stage 4 cancer.
Mahibaluan nga samtang nagaisahanon si Johnny sa ila balay gin-atake ini sang balatian matapos nga nabudlayan ini sa pagginhawa rason nga ginkakas sini ang tubo nga natakud sa iya tutunlan.
Bangud diri, gintinguhaan sini nga magguwa agud nga magpangayo sang bulig apisar nga indi ini makahambal apang dimalas naman nga nadusmo ini rason nga nag-angkon pa sang pilas sa tuhod kag ulo ang pasyente.
Gani, nagpahunay-hunay ini sa isa ka puno kag naabtan sang iya nga hinablos rason nga ginbuligan niya ini pasulod sa balay.
Bangud sa natabo gindala nila ang pasyente sa Mambusao District Hospital agud kuntani nga i-admit kag dapatan sang nagakaigo nga pagbulong.
Sa baylo nga i-admit ginpakamaayo na lamang sang nurse sang amo nga ospital nga limpyohan ang pilas sa ulo kag tuhod tuga sang pagkadusmo man sini apang ang tutunlan nga mismo may yara sang tumor ang ginpabay-an sang nasambit nga ospital.
Mahibaluan nga ginapahayag nga base sa panaysayon sang nurse nga nag-atubang sa pamilya ginaalegar nga ginbalibaran sila sang amo nga ospital bangud wala sang unod ang ila nga PHILHEALTH.
Magkahalo nga kaakig kag kaluoy naman ang nabatyagan sang mga kabataan ni Johnny rason nga wala nila napunggan nga mag post ukon magpabutyag sa Facebook kun sa diin ginabasol nila ang nasambit nga pasilidad.
Bangud diri, nakalab-ot sa ospital ang amo nga post rason nga ginpatawag kag ginpabalik nila ang pasyente kag ginpaadmit na lang sa ospital./
