ROXAS CITY – Liwat nga nakarekord sang panibag-o nga kaso sang Coronavirus Disease ukon COVID-19 ang banwa sang Tapaz, Capiz.
Sa interview sang Bombo Radyo Roxas kay Mayor Roberto Palomar, ginpahayag sini nga isa ka 68-anyos nga tigulang ang ikaduha nga nagpositibo sa nasambit nga balatian sa ila banwa.
Ang wala na ginhingadlan nga tigulang isa ka Locally Stranded Individual ukon LSI kag nag-abot sa probinsya sadtong Hunyo 24 gikan sa Santa Mesa kag Metro Manila nga residente sang Barangay San Miguel Ilawod sang amo nga banwa.
Suno kay Palomar nga gilayon ini ginpaidalom sa 14 day quarantine apang wala nila ini ginpaguwa bisan tapos na ang iya quarantine period.
Ini bangud wala pa ang resulta sang iya Real Time – Polymerase Chain Reaction ukon RT-PCR Test rason nga naghulat pa sila sang 25 diyas antes nabal-an nga positibo ini sa nasambit nga virus sang Hulyo 19.
Nahibaluan nga asymptomatic ang nasambit nga LSI kag wala nakabatyag sang anuman nga sintomas sang COVID-19.
Apang, ginpahayag gid mismo ni Palomar nga yara na sa Roxas Memorial Provincial Hospital ang nasambit nga LSI para sa nagakaigo nga pagbulong matapos nga natukiban nga positibo ini sa nasambit nga virus.
Samtang, nagpanugyan man ini sa mga residente nga indi magkabalaka bangud ginahimo man nila ang tanan agud indi na madugangan pa ang kaso sang nasambit nga balatian sa ila banwa.
