ROXAS CITY-Nagapabilin sa karsel sang Panay Municipal Police Station ang 40-anyos nga Barangay Kagawad matapos nga nagbato sa ila nga Punong Barangay sa Barangay Cabugao Este, Panay Capiz.
Ginkilala ang nasambit nga Kagawad nga si Barangay Kagawad Rosellier Late, residente sang nasambit nga lugar.
Sa interview sang Bombo Radyo sa kay Kagawad Late ginpahayag sini nga nagsinabtanay sila ni Punong Barangay Tomas Borreros sa barangay hall sang tinalikdan nga adlaw.
Nag-abot sa punto nga nagtaas ang tingog sini rason nga nagpangayo sang responde sa mga kapulisan si Borreros.
Suno sa kay Late nga wala sini matandaan kun ano ang gintunaan sang ila pagsabtanay ni Borreros bangud wala man sila sang daan nga hiligut-anon sang nasambit nga opisyal.
Apang aminado ini nga naka-inom sang makahulubog nga ilimnon sang aga antes natabo ang insidente.
Gin-ako man sini nga nakuhaan ini sang armas-luthang nga plastik sang mga kapulisan apang hugot sini nga gin-athag nga hampanganan ini sang iya nga bata.
Gin-athag ni Late nga naghusay na sila ni Borreros natuhoy sa nasambit nga insidente kag ginpabugal sini nga gindal-an pa ini sang pagkaon sang nasambit nga opisyal sa sulod sang karsel.
Samtang ginpasakaan na sang panombongon nga Alarm and Scandal kag Disobedience to Authority si Late sa Provincial Prosecutors Office sa Roxas City Hall of Justice.
