ROXAS CITY-Nagreklamo sa Roxas City Police Station ang isa ka driver sang isa ka construction firm matapos nga ginaalegar ginsumbag sang iya kaupdanan sa trabaho sa Barangay Balijuagan, Roxas City.
Sandig sa alegasyon sang tagareklamo nga ginkilala nga si Joenard Batisla-ong, 41-anyos tumandok sang San Rafael, Barotac Viejo, Iloilo ginpahayag sini nga masadya ini sila nga naga-inom upod man ang suspek nga si Rogelio Mendez, 38-anyos residente sang Barangay Candelaria, Tapaz Capiz sang hinali nga nagsulod ang suspek sa barracks.
Apang sa pagbalik sini, ginaalegar sang tagareklamo nga ginsumbag ini ni Mendez sa guya.
Bangud sini nag-angkon sang lagub sa guya ang biktima nga ginhatagan sang first aid sang mga katapo sang Capiz Emergency Response Team (CERT).
Samtang ginbalik naman sang mga kapulisan sa barangay justice sang nasambit nga barangay ang amo nga insidente.
