TAGOLOAN, Misamis Oriental – Ginpaidalom sa inquest proceedings ang 69 ka Chinese nationals kag isa ka Pilipino matapos ang raid sa isa ka steel manufacturing facility sa Misamis Oriental.
Suno kay Gilberto Teodoro Jr., gina-imbestigaran ang mga nadakpan may kaangtanan sa ginapatihan nga paglapas sa immigration laws, labor standards kag environmental laws.
Pahayag pa niya isa sa ginatan-aw sang otoridad ang posible nga paglapas sa safety rules sa sulod sang workplace sang mga foreign workers lakip ang documented kag undocumented Chinese nationals.
Ang operasyon ginpatigayon sa Phil. Sanjia Steel Corporation nga nahamtang sa sulod sang PHIVIDEC Industrial Estate sa banwa sang Tagoloan.
Dugang pa sa ginberipika sang imbestigador ang report nga posible naga-proseso ang pasilidad sang “Harmful and Noxious Materials” paagi sa paggamit sang induction furnaces, apang gin-athag niya nga inisyal pa lamang ang mga findings kag wala pa sang pinal nga konklusyon.
Ang operasyon ginpatigayon upod ang Presidential Anti-Organized Crime Commission ukon PAOCC nga ginapamunuan ni Benjamin Acorda Jr..
Suno pa kay Teodoro, gin-imbestigaran man kun paano nakapadayon sa operasyon kag nakakuha sang permits ang kumpanya bisan may nagligad nga Senate testimony nga naga-angkon nga si Tony Yang, ang ginapatihan tag-iya sang kumpanya, indi lehitimo nga Filipino citizen.
Ginatan-aw man sang mga imbestigador ang alegasyon nga posible naga-produce ang kumpanya sang substandard steel, apang gin-athag sang defense chief nga wala pa sang final findings samtang padayon pa ang imbestigasyon.
Samtang, lima ka incorporators nga may kaangtanan sa kumpanya ang ginapangita pa sang mga otoridad.
Sa karon nagpaandam naman si Teodoro nga mahimo mapasakaan sang obstruction of justice ang bisan sin-o nga magpanghilabot ukon magpugong sa nagapadayon nga legal proceedings.
