Ginpahibalo sang Ministry of Health nga walo ka indibidwal ang nagkalapilasan matapos nagtay-og ang 7.2 magnitude nga linog sa Southern Peru.
Sandig sa anunsyo sang ahensya, lima sa nagkalapilasa ang gindangatan na sang nagakaigo nga pagbulong sa duha ka mga ospital sa Ica Region, samtang tatlo naman ang yara sa Arequipa Region nga magkatuhay nga nahamtang sa Southwestern Peru.
Wala naman sang may na-rekor nga may napatay suno kay Prime Minister Gustavo Adrianzen.
Suno sa United States Geological Survey, natabo ang linog 8 kilometers (5 miles) sa nakatundan sang Atiquipa kag ginabulubanta nga 600 kilometers (372 miles) sa nabagatnan sang capital nga Lima.
Una na nga nagpaguwa ang Pacific Tsunami Warning Center (PTWC) sang alert warning sang “possible” tsunami waves nga magalab-ot sa 1-3 metros sa mga baybayon sa nasambit nga pungsod, apang sang ulihi ginbawi man sang PTWC ang amo nga paandam.
Nahibaluan nga ang Peru kag iban pa nga pungsod sa South American Pacific Coast ang nahamtang sa border sang duha ka tectonic plates: ang South American plate kag ang Nazca plate.
