Naglab-ot na sa 7.4 milyon ka tawo, ukon kabaylo sang 2.1 milyon ka pamilya, ang apektado sang mga kalamidad nga nagtupa sa nagkalain-lain nga bahin sang Pilipinas, suno sa pinakabag-o nga datos sang National Disaster Risk Reduction and Management Council (NDRRMC).
Lakip sa mga rehiyon nga naapektuhan ang Ilocos Region, Cagayan Valley, Central Luzon, CALABARZON, Bicol Region, Western Visayas, Zamboanga Peninsula, Cordillera Administrative Region, National Capital Region kag MIMAROPA.
Nagapabilin sa 29 ang kabug-usan nga napatay bangod sa epekto sang mga bagyo nga Luis kag Maymay, lakip ang habagat.
Sa mga nasawi, 15 ang narekober sa Benguet, apat sa Rizal kag Batangas, duha sa Caloocan, kag tig-isa sa La Union, Quezon, Oriental Mindoro kag Negros Occidental.
May yara man sang tatlo ka tawo nga ginreport nga missing, samtang 19 naman ang nasamaran.
Samtang, 40,600 ka tawo, ukon 11,900 ka pamilya, ang nagapabilin sa mga evacuation center bangod sa epekto sang kalamidad.
Ginalantaw naman nga 2,300 ka balay ang naguba ukon nag-antos sang kahalitan tungod sa mga bagyo kag habagat.
Sa karon, 89 ka lugar sa bilog nga pungsod ang yara na sa idalom sang state of calamity bangod sa daku nga epekto sang mga bagyo kag habagat.
