ROXAS CITY – Ginpaidalum sa intervention program sang crisis center sang City Social Welfare and Development (CSWD) Puluy-an sang Pagpalangga ang pito ka mga kababainhan nga biktima sang human trafficking.
Ini kasunod sang ginpatigayon nga operasyon sang Criminal Investigation and Detection Group (CIDG-Capiz) sa Paradise bar sa Altavas Subdivision, Barangay Baybay, sining syudad.
Sa entrapment kag rescue operation sang mga kapulisan, natigayon nga madakpan ang floor manager sang bar nga si Elcid Besana Dario nga karon yara sa kostodiya sang CIDG-Capiz.
Nagpamalibad naman maghatag sang komento si Dario angut sa insedente sang ginpangayuan ini sang pahayag sang Bombo Radyo kadungan ang pagsiling nga atubangon na lamang sini sa korte ang panumbungon nga ipasaka batuk sa iya.
Nahibaluan nga nagaserbe nga bugaw si Dario sa mga kababainhan nga nagatrabaho sa amo nga bar sa diin siya mismo ang nagapakigtransaksyon sa mga kalalakinhan nga nagapangita sang hingalit nga kalipay, kabaylo sang kantidad nga ila makasugtan.
Gikan ang mga kababainhan sa magkatuhay nga mga kaprobinsiyahan sa diin kadam-an sa ila ang ginpasalig sang maayo nga trabaho nga nagahulat sa ila.
Samtang narekober sa suspek ang 500 pesos nga marked money, personal nga kwarta nga naglab-ot sa 7 mil 720 pesos kag isa ka condom.
Indi malipod nga ginpaidalom sa monitoring ang nasambit nga balay kalingawan antes ginpatigayon ang operasyon.
