CAGAYAN DE ORO CITY, Philippines – Pitong ka indibidwal, lakip ang isa ka 10-bulan nga lapsag, ang naluwas sa serye sang anti-trafficking operations batok sa Online Sexual Abuse and Exploitation of Children “OSAEC”, sa Northern Mindanao.
Ang operasyon nga ginpatigayon halin Enero tubtob Marso ginpangunahan sang Recovery and Reintegration Program for Trafficked Persons “RRPTP” sang Department of Social Welfare and Development “DSWD-10”, kaupod ang nagkalain-lain nga law enforcement agencies.
Sa pito ka naluwas, lima ang menor de edad kag duha naman ang young adults nga gin-abuso sang mga menor pa sila. Nagalakip ini sang apat ka lalaki kag tatlo ka babayi.
Tatlo sa mga operasyon ang ginpatigayon sa Iligan City kun sa diin anom sa pito ka biktima ang naluwas. Samtang ang isa pa ka operasyon ang ginlunsar sa Cagayan de Oro City matapos ang isa ka digital forensics breakthrough.
Ginpahayag sang kapulisan nga ang kadalag-an sang mga operasyon bangod sa mas ginpabakod nga kampanya kontra cybercrime sang Philippine National Police (PNP) sa rehiyon.
Base sa imbestigasyon, may nadiskubre nga dako nga grooming network nga naga-target sang mga kabataan sa nagkalain-lain nga pungsod, matapos makuha ang ebidensya halin sa isa ka naaresto nga foreign national.
Dugang pa sa nakumpiskar sa operasyon ang mga iligal nga materyales nga nagapakita sang child sexual abuse.
Natukiban man nga isa ka iloy nga ginabugaw ang laragway sang iya kaugalingon nga mga kabataan paagi sa Facebook Messenger.
Sa subong, ang pito ka survivors gin-atipan anay sa DSWD-10 facilities kun sa diin ginahatagan sila sang psychosocial support, hygiene kits, kag financial assistance.
Nahibaluan man nga ang amo nga kolaborasyon sang mga ahensya lakip na ang PNP Women and Children Protection Center–Mindanao Field Unit, PNP Regional Anti-Cybercrime-10, Task Force OSAEC Iligan, Philippine Internet Crimes Against Children Center, kag iban pa nga ahensya sang gobyerno.
Sa karon padayon ang mga otoridad nga padayon nga palig-unon ang ila pagbinuligay agud maprotektahan ang mga kabataan batok sa online sexual abuse and exploitation of children.
