Ginkumpirma sang Department of Migrant Workers (DMW) nga pito ka mga Filipino seafarers ang napilasan matapos nga naigo sang Iranian drone attack ang ila Maltese-flaged container ship nga CMA CGM San Antonio sa Strait of Hormuz.
Suno kay DMW Secretary Hans Leo Cacdac, luwas ang tanan nga pito ka mga Pinoy crew members sa pag-atake apang nag-angkon sang pilas sa lawas kag sa subong padayon nga ginahatagan sang medical attention sa mga ospital.
Suno sa iya, apat sa mga ini ang nakaangkon sang minor injuries, samtang ang tatlo ang yara sa serious condition kag hugot nga ginabantayan.
Sa subong, ginamonitor sang Philippine Embassy officials kag labor attachés ang kahimtangan sang mga pilason nga mga Pinoy kag nakig-angot na ini sa hospital authorities.
Nahibaluan nga natabo ang insidente samtang naga-agi ang barko sa Strait of Hormuz nga sa subong ginakabig nga high risk kag warlike area bangud sa tensyon sa tunga sang US, Israel kag Iran.
