ROXAS CITY – Nagpabalhag sa Roxas City Police Station ang 65-anyos nga senior citizen matapos nga ginaalegar nga ginhiluan ang iya hinuptan nga mga ido sa Barangay Sibaguan, Roxas City.
Ginkilala ang tagreklamo kay Juliet Anonat sang amo nga lugar.
Sandig sa iya ginpabalhag nga may yara sang duha ka mga kalalakinhan ang nagkadto sa atubang sang ila balay sadtong Oktubre 20 nga ginapatihan posible responsable sa pagkamatay sang iya 7 ka mga ido.
Bangud diri, ginpakamaayo na lamang sini nga iparekord sa pulisya ang natabo.
Matandaan sadtong bulan sang Hulyo nagpalab-ot man ang pila ka mga residente sang amo nga lugar matapos nga ginhiluan rason nga nagkalamatay ang ila mga ido.
Dakop ang isa ka lalaki nga wanted sa kaso nga “Falsification” sa Barangay Lawaan, Roxas City.
Ginkilala ang arestado nga si Edward Selim Baldo sang amo nga lugar.
Gin-aresto ini sang gintingub nga pwersa sang Nabas kag Aklan Philippine National Police.
Ang nasambit nga warrant of arrest ginpapanaotg ni Judge Cleo Marie Santillan, presiding judge sang 5th Municipal Trial Court sa Malay, Aklan batuk kay Baldo sadtong Setyembre 10, 2020.
Ginrekomendar naman sang korte ang P36,000 nga piyansa para sa temporaryo sini nga kahilwayan.
