ROXAS CITY CAPIZ – Lunsay nagpositibo sa ginpatigayon nga drug test ang 7 ka mga indibidwal nga nadakpan sa ginkasa nga drug buybust operation sa Sitio Cassandra, Barangay Punta Tabuc, Roxas City.
Matandaan nga ginkilala ang mga nagkaladakpan nga sanday Jessa Balquedra Acutillar, residente sang Barangay Dayao, Romeo Aro Calara sang Barangay Banica, Kim Macapalan Delfin sang Barangay Bolo, Gerald Gando Artillero sang Barangay Cagay, Jean Depol Berdugo, ginapahayag nga caretaker sang drug den, Leonardo Dela Cruz, kag Ally Pineda Matta nga lunsay mga residente sang nasambit nga lugar.
Nakuha sa paghinakop sang mga ini ang 11 ka sachets sang ginapahayag shabu nga may kabug-aton kapin 20gramos kag Standard Drug Price nga P140,000.00 kag iban pa nga mga drug paraphernalia’s.
Sa interview sang Bombo Radyo sa Provincial Officer sang Philippine Drug Enforcement Agency (PDEA) Capiz nga si Maria Melinda Panaguiton, ginpahayag sini nga madugay na nila ginamonitor si Dela Cruz kung sa diin madanlog sa tion sang operasyon.
Mahibaluan nga pinaagi sa gintingub nga pwersa sang PDEA Antique, First Capiz Provincial Office Mobile Force Company, kag katapo sang Roxas City PNP, natigayon nga madakpan ang nasambit nga mga persona.
Ginpahayag man ni Panaguiton nga anay na nila nga ginsalakay ang amu nga lugar kung sa diin masami ginaruruan sang illegal nga droga.
Magapangatubang ang mga ini sa kaso nga paglapas sa RA 9165 “Comprehensive Dangerous Drugs Act of 2022”.
Sa karun, nagapabilin sa kustodiya sang Roxas City PNP ang mga nagkaladakpan para sa nagakaigo nga disposisyon.
