ROXAS CITY – Gilayon nga ginpanugyanan nga magpaidalom sa self-quarantine ang kapin sa 7 ka mga residente sang Barangay Libas, Roxas City nga mga tinawo sang pamilya ni Patient No. 32, ang 60 anyos nga babaye nga napatay kag nagpositibo sa coronavirus disease (COVID-19).
Ini ang ginpahayag ni Punong Barangay Richard Arrojado sang mainterview sang Bombo Radyo.
Suno kay Arrojado, gilayon siya nagpakigsapol sa mga Barangay Health Workers (BHW’s) kag mga barangay tanod sang amo nga barangay kag ginpanugyanan nga padulungan ang nasambit nga mga indibidwal.
Nahangawa si Arrojado nga suno diri posible mabutang sa peligro ang ikaayong lawas sang mga pumuluyo.
Ginpanugyanan suno diri ang nasambit nga mga persona nga magpaidalom sa self-quarantine sa ila tagsa ka mga balay.
Ginhatagan niya man sang kaugalingon nga thermometer ang mga ini agud mamonitor ang ila kaugalingon.
Apang nagaapelar si Arrojado sa gobyerno sang siyudad nga kun mahimo kuhaon na lamang sa ila barangay ang nasambit nga mga indibidwal kag ibutang sa nagakadapat nga isolation area agud mapahamtang man ang iban nga mga residente nga nagakabalaka sa ila ikaayong-lawas.
Kun wala sang pagahimuon ang gobyerno sang siyudad suno kay Arrojado, nakahanda siya nga magpakig-angut sa pamunuan sang eskwelahan sang amo nga barangay.
Plano sini nga hinyuon nga i-designar ang nasambit nga eskwelahan bilang isolation area sang nasambit nga mga indibidwal kag nakahanda man ini nga maghatag sang bulig para sa ila ilabi na ang ila mga kinahanglanon.
