ROXAS CITY – Nagahilibion ang iloy sang balot vendor nga napatay bangud sa aksidente sa karsadahon nga sakup sang Barangay Indayagan, banwa sang Maayon, bangud indi ini makapati sa gindangatan sang iya nagaisahanon nga bata.
Sa interview sang Bombo Radyo kay Maria Estores, iloy ni Helbert Estores, suno diri mahinay magpadalagan sang traysikol ang iya bata bangud masami niya ini nga ginalaygayan.
Nasubuan lang ini bangud isa na ka bulan nga wala sini makaupod ang iya bata bangud yari ini nagatenir sa syudad sang Roxas, kaupod ang iya Iloy kag mga utod, samtang sa banwa sang Panit-an nagapauli si Helbert.
Nakibot lang ini sang ginbalitaan nga wala na ang iya bata.
Matandaan nga kagab-i sang Miyerkules samtang nagapauli na si Estores halin sa pagbaligya balot, sakay ang ginamaneho nga traysikol, sang nabungguan ini sang kasugata nga Suzuki Raider 150 nga ginamaneho ni Alvin Ilagan, 22-anyos, residente sang Poblacion Ilawod, banwa sang Maayon.
Nagaguwa sa inisyal nga imbestigasyon sang Maayon MPS nga nag-overtake ang raider sa isa ka motorsiklo kag dumiretso sa linya ni Estores.
Bangud sa tuman ka baskog sang impact sang pagkabunggo, lunsay patay ang nasambit nga mga driver.
Sa karon, yara nahaya ang bangkay sang biktima sa De Jesus Memorial Homes, diri sa syudad sang Roxas.
