ROXAS CITY – Indi masukat ang kalipay nga nabatyagan sang isa ka 70-anyos nga lola matapos nga napilian ini sang mga kapulisan sang Roxas City Police Station nga mapatindugan sang panibag-o nga balay sa nagapadayon nga proyekto sang mga kapulisan nga BAHAYNIHAN “Kapwa Ko, Sagot Ko”.
Ginkilala ang nasambit nga benepisyaryo nga si Libertad Nacman sang Sitio Vista, Barangay Libas sining siyudad.
Suno kay Nacman, daku gid ini nga bulig para sa iya nga pamilya bangud ginpahayag sini nga lima sila ang nagatulog sa hayob-hayob nga balay nga nagaserbi nila nga puluy-an kun sa diin ginatuluan pa sila sa tagsa ka magbubo ang mamunog nga pag-ulan.
Nahibaluan nga nagatiltig lamang ini sang talaba agud mabaligya agud magaserbi nila nga palangabuhian.
Tuman naman sini ang pagpasalamat sa mga kapulisan sang Roxas City PNP sa pagpanguna ni Police Lieutenant Colonel Ricardo Jomuad Jr., nga nagbulig sa iya agud mahatagan sang ensakto nga puloy-an.
