ROXAS CITY – Nag-abot na sa probinsiya sang Capiz ang dugang nga 71 ka mga locally stranded individuals (LSI’s) gikan sa Metro Manila.
Ang nasambit nga mga indibidwal ang sakay sang Philippine Airlines ukon PAL nga naghugpa sa Roxas City airport.
Mahibaluan nga mismo ang gobyerno probinsyal ang nagpanikasog nga makapauli ang nasambit nga mga indibidwal sa probinsya.
Nahibaluan nga 26 ka mga LSI’s nga residente sang Roxas City ang nag-abot sa probinsya; sa Maayon- 1, Panay- 2, Panitan- 5, Pilar- 3, Pontevedra- 7, Pres. Roxas- 3, Cuartero – 1, Dao-5, Dumalag-3, Dumarao – 6, Ivisan – 2, Jamindan – 1, Mambusao – 3, Sigma- 2 kag Tapaz nga may isa.
Ang nasambit nga mga LSI’s ang ginpangsugat sang mga katapo sang magkatuhay nga mga Municipal Disaster Risk Reduction and Management Office (MDRRMO) sa mga kabanwahanan kag ginpangdul-ong sa designated quarantine facility sang ila tagsa ka mga local government unit (LGU’s) samtang ang iban naman ang igapaidalom sa strict-home quarantine.
Sa karon, naglab-ot na sa 4,677 ang numero sang mga LSI’s nga nakapauli sa probinsya.
