CUARTERO, CAPIZ – Pilas sa tiyan, liog kag likod ang naangkon sang isa ka babayi nga senior citizen matapos nga ginlabo sang iya umagad sa Barangay Pob. Tacas, Cuartero, Capiz.
Ginkilala ang biktima nga si alyas Clarit, 74-anyos, samtang ang ginapahayag nga suspek amu si alyas Itik, 48-anyos nga lunsay mga residente sa nasambit nga lugar.
Base sa impormasyon nga nagikan sa Cuartero Municipal Police Station, daan nga hiligut-anon ang ginalantaw nga motibo sang kapulisan sa natabo nga krimen.
Ginaalegar nga may natabo nga pagbinaisay sa magtimbang nga bahin tubtob nga nag-abot na sa punto nga ginlabo sang suspek ang biktima.
Bangud sa natabo, nag-angkon sang pilas sa magkatuhay nga parte sang lawas ang biktima tuga sang pagpanglabo nga gilayon naman ginpadangat sa Dao District Hospital para sa nagakaigo nga pagbulong kag yara na sa karon sa istable nga kondisyon.
Narekober naman sa ginluntaran sang insidente ang binangon nga gingamit sa pagpanglabo.
Priso naman sa Cuartero PNP ang suspek.
