ROXAS CITY – Naghatag sang 75-diyas nga deadline ang Department of Interior and Local Government sa kapin 1,245 ka mga local government units (LGU’s) sa Pilipinas nga mahawanan ang tanan nga ma-identify nga road obstruction bilang pagtuman sa kampanya sang gobyerno nga Road Clearing Operation 2.0.
Ginpahayag ni DILG Capiz provincial director John Ace Azarcon nga pinaagi sa direktiba ni DILG Secretary Eduardo Año, ginamandu sini sa tanan nga LGUs labi na sa mga barangay officials nga hawanan sa anuman nga sablag ang mga barangay kag tertiary roads kalakip ang mga sidewalks.
Suno kay Azarcon nga makabig sablag ang paggamit sang karsada nga baligyaan sang mga ginabaligya sang mga vendors ukon paggamit sang karsada bilang terminal.
Sa karon padayon ang information dissemination sang mga opisyales sang DILG sa mga alkalde sa kabanwahanan, agud mapaintiende sa ila ang ka-importansiya sang nasambit nga kampanya sang gobyerno.
