Patay ang 79-anyos nga iloy matapos ginbakol sang salsalon sang iya man lang kaugalingon nga anak sa Puro 6, Barangay Guindapunan, Catbalogan City, Samar.
Suno sa impormasyon halin sa Catbalogan City Police Station, natabo ang krimen sang aga sang Setyembre 3.
Ang biktima amo si alyas Feli, kag isa ka vendor samtang ang suspek naman amo si alyas Anik, 45, tricycle driver kag residente man sa nasambit nga lugar.
Suno kay Lt. Col. Normal Ala, hepe sang Catbalogan City Police Station, nagapangayo sang kwarta ang suspek kag nagbaisay sila sang iya iloy kag nagresulta sa pagpanakit.
Nagaguwa man sa imbestigasyon nga ginkuga sang suspek ang iloy kag ginbakol sang salsalon ang ulo nga nangin rason sang iya kamatayon.
Gindala pa sa ospotal ang biktima apang gindeklara nga patay sang mga doctor.
Ang isa pa ka anak sang biktima ang naghatag sang impormasyon sa pulis kag siya man ang nag-surrender sa suspek sa mga otoridad.
Kaso nga parricide ang ginpasaka sang mga otoridad batuk sa suspek.
