ROXAS CITY – Ginpasakaan sang reklamo sa Provincial Prosecutor’s Office ang walo ka mga barangay officials sang Barangay Sta. Carmen, Dumalag, Capiz bangud sa anomaliya sa implementasyon sang Social Amelioration Program.
Ini ang ginkompirma mismo ni CIDG-Capiz Head Police Major Chris Artemius Devaras sang mainterview sang Bombo Radyo.
Mahibaluan nga una nga nagpalab-ot sang reklamo sa Criminal Investigation and Detection Group (CIDG) Capiz ang pila ka residente sang nasambit nga barangay natuhoy sa anomaliya sa distribusyon sang SAP rason nga ginmanduan ang Dumalag Municipal Police Station nga mag-imbestigar.
Napamatud-an sa imbestigasyon nga nakabaton sang P6, 000 nga ayuda ang pila ka mga indibidwal nga may anak nga government employees nga ginpalusot sang mga barangay officials.
Bangud diri, ginpasakaan sang reklamo nga paglapas sa Republic Act 3019 ukon Anti-Graft and Corrupt Practices Act ang punong barangay nga si Rosemary Puyon kag ang pito sini ka mga barangay kagawad.
