ROXAS CITY– Padayun nga ginabulong sa ospital ang walo ka mag-abyan matapos mahulog sa kanal ang ila ginasakyan nga owner type jeep sa Barangay Agustin, Navarra, Ivisan, Capiz.
Ginkilala ang mga pilason nga sanday Edmichael Jay Estiquita, 21-anyos kag driver sang salakyan, Joseph Brent Lasanas, 22-anyos; Lemuel Berneza, 22-anyos; Angel Kate Torres, 22-anyos; Joana Marie Anisco, 20-anyos; Joshua Kenneth Anas, 21-anyos; Katriena Mae Delfin, 21-anyos kag Eurra Yebe, 22-anyos.
Ba-se sa imbestigasyon sang traffic section sang Ivisan Municipal Police Station nadulaan sang kontrol sa manubela ang driver nga si Estiquita rason nga nahulog ang ila nga salakyan.
Ginapatihan nga hubog ang nasambit nga driver kag napiyungan ini samtang nagamaneho.
Nahibaluan nga gikan sa isa ka kasadyahan ang mag-abyan kag magapauli na sang magluntad ang aksidente.
Nag-angkon sang pilas sa ila mga lawas ang mga biktima nga gilayon gindala sa ospital agud madapatan sang pagbulong.
