8 ka mga close-contacts sang suldado nga nagpositibo sa COVID-19 sa Capiz, gin-isolate na

ROXAS CITY – Tubtob sa karon nagapabilin nga ‘asymptomatic’ ang isa ka suldado nga nagpositibo sa coronavirus disease (COVID-19) sa Capiz.

Ini ang ginpahayag ni Major Alexander Zapanta, Medical Corps Commanding Officer sang 3^rd Infantry Batallion sang Philippine Army sang mainterview sang Bombo Radyo.

Suno diri nga kasunod sang pag-positibo sang 24 anyos nga suldado sadtong Hulyo 30, gilayon ini nga gindala sa Roxas Memorial Provincial Hospital.

Ginkuhaan ini liwat sang real-time polymerase chain reaction (RT-PCR) test kag ginahulat pa ang resulta.

Ginpahayag sini nga gilayon man sila nga nagpatigayon sang contact-tracing sa mga nakahalubilo sang amo nga suldado.

Suno sa opisyal nga walo ka mga suldado nga naka-close contact sang amo nga pasyente ang gilayon nga gin-isolate.

Mahibaluan nga nagpadulong sa Iloilo ang nasambit nga suldado agud magpa-opera apang sang ginpaidalom ini sa swab test antes ang operasyon, nagguwa nga positibo siya sa COVID-19.