ROXAS CITY – Ginkumpirmar sang Punong Barangay sang Barangay Poblacion, sa banwa sang Pilar nga may walo na ka mga kabataan nga nakabatyag sang pagpalanuka matapos nga nakakaon sang panginhason.
Sa interview sang Bombo Radyo kay Barangay Kapitan Boyet Bonilla, ginsiling sini nga sandig sa impormasyon nga iya nabaton 4 ang nauna nga gindala sa Jesus Colmenares District Hospital sa bahin sang Balasan, Iloilo bangud sa pagpalanuka, nga nagapang-edaron sang 3, 7, 9 kag 12 ka tuig.
Nadugangan ini subong nga aga, nga nagikan sa iban nga barangay.
Nabalhag ang walo ka mga kaso sang ginaalegar food poisoning sa Barangay sang Poblacion, Binaobawan kag Natividad.
Ginpahayag ni Bonilla nga sang Miyerkules sang udto, greenshell ang sud-an sang mga kabataan nga nagikan sa ila barangay.
Matandaan nga kahapon nga adlaw, nagpaguwa sang abiso ang lokal nga gobyerno sang Pilar kag ginkumpirmar man ini ni Mayor Arnold Perez sang mainterview sang Bombo Radyo, nga ginapalikaw ang ila pumuluyo sa pagkaon sang panginhason nga makuha sa ila kadagatan, bangud sa pagkapositibo sa red tide.
