PILAR, CAPIZ – Nagapabilin sa kustodiya sang Pilar Fishing Port kag Bantay Dagat sa amo nga banwa ang mga nadakpan nga mga fishing parapahernalias matapos nga naaktuhan nga nagapatigayon sang iligal nga pagpangisda sa kalalawran nga sakop sang Pilar, Capiz.
Nadakpan nga nagapatigayon sang iligal nga pagpangisda amo sanday Victor Bordo, 30 anyos sang Barangay Binaobawan, Pilar, Capiz; Teodolfo Viente III, 42 anyos; Richard Villanueva, 44 anyos, Reynaldo Baculinao, 37 anyos nga lunsay mga residente sang Barangay Poblacion, Pilar, Capiz.
Magluwas diri nadakpan man sanday Mario Bechayda, 44 anyos residente sang Barangay Pondol, President Roxas, Capiz, Junito Beniglo, 47 anyos, Balis Bermejo, 47 anyos kag Jose Rada, 46 anyos nga lunsay mga residente sang Barangay Marita, President Roxas, Capiz.
Narekober sa posisyon sang mga nadakpan amo ang mga pump boats nga nagapatigayon sang iligal nga pagpangisda, pito ka mga motorized pump boats with engine, pito ka mga trawl nets kag pito ka mga fish nets.
Ang nasambit nga mga persona magapangatubang sa panumbungon nga paglapas sa Municipal Ordinance no.1, series of 1999.
