ROXAS CITY – Confine sa ospital ang walo ka tuig nga bata matapos sug-an ang iya bayo sang pito ka tuig nga classmate sa CR sang Culasi Elementary School.
Nag-angkon sang daku nga paso sa dughan ang biktima nga si alyas Boy bangud sa pagsuga sa iya bayo nga ginasuksok sang classmate gamit ang posporo.
Sa interview sang Bombo Radyo Roxas kay John Felix Apinan, tiyo sang biktima, ginpahayag sini nga natingala sila sang makita ang daku nga pilas sa dughan sang hinablos.
Ginsugid lamang sa ila sang biktima nga natumba ini rason nga nakaangkon sang pilas sa dughan.
Matapos ginpatan-aw sa hilot ang hinablos, ginhambalan sila nga indi ini pilas sa pagkatumba.
Bangud diri, nagduda si Apinan gani liwat sini nga ginpamangkot ang biktima nga nag-ako nga ginsug-an sang iya classmate ang iya bayo sa sulod sang CR.
Nahibaluan nga nagaserbe nga guardian sang biktima ang lola kag tiyo nga si Apinan, bangud nagatrabaho sa Manila ang iloy sini.
