ROXAS CITY – Nagapabilin sa tagsa ka mga quarantine facilities ang 9 ka mga indibidwal nga nagpopsitibo sa Coronavirus Disease ukon COVID-19 sa probinsiya sadtong Agosto 6, 2020.
Base sa ginpaguwa nga datos sang Provincial Health Office, walo ang mga nagpositibo nga mga Locally Stranded Individuals (LSI’s) kag isa naman ang Returning Overseas Filipino (ROF) nga lunsay tanan mga “Asymptomatic”.
Sa pagpangusisa sang Bombo Radyo kay Dra. Sandra Sorongon, Municipal Health Officer sang banwa sang Maayon, nga isa ka 25-anyos nga babayi kag 5 ka bulan na nagabusong kag residente sang Barangay Piña sang nasambit nga banwa ang nagpositibo nga ROF. May yara ini sang history of travel sa pungsod Qatar kag Metro Manila kag nakapauli sa pungsod sadtog Hulyo 27 nga nagpuli naman sa probinsiya sakay sa sweeper flight sang tinalikdan nga Agosto 2.
Ginkompirmar naman ni Mayor Esteban Dodoy Evan Contreras nga may yara sang tatlo ka mga LSI’s nga residente sang banwa sang Pontevedra ang nagpositibo sa COVID-19. Suno kay Contreras nga isa ka 6 ka tuig nga bata nga babayi kag amay sini nga residente sang Barangay Poblacion, Ilawod ang nagpositibo sa COVID-19. May yara sila sang history of travel sa Pasig City,Metro Manila kag nakapauli sa probinsya sadtong Hulyo 24. Magluwas diri, nagpositibo man sa amo nga balatian ang 29-anyos nga babayi nga residente sang Barangay Tacas sang amo nga banwa nga may yara sang history of travel sa Caloocan City, Metro Manila.
Ginkasubo naman ni Muncipal Administrator sang Pilar matapos nga may yara sang tatlo ka mga panibag-o nga kaso sang COVID-19 ang napagkit sa nasambit nga banwa. Suno kay Mr. John Heredia nga magpamilya ang nagpositibo sa COVID-19 kag nagapabilin karon sa quarantine facility sang nasambit nga banwa. Ini ang ginalakipan sang pito ka bulan nga lapsag, iloy sini kag lola ang nagpositibo sa nasambit nga balatian nga lunsay may yara sang history of travel sa Montalban Rizal kag nakapauli sa probinsya sadtong Hulyo 30. Nagpasalig naman si Heredia nga wala sang dapat nga kabalak-an ang mga pumuluyo bangud wala man nakaguha ang nasambit nga mga LSI’s.
Samtang ginkompirmar naman sang Municipal Health Officer sang Dumalag nga may yara sang isa ka LSI nga nagpositibo sa COVID-19 sa ila banwa. Suno kay Dra. Anna Mae Belasoto, nga isa ka 31-anyos nga babayi nga residente sang Barangay San Rafael ang nagpositibo sa nasambit nga balatian. May yara ini sang history of travel sa Las Piñas, Metro Manila kag nakapauli sa probinsiya sadtong Hulyo 27.
