9 ka tuig nga bata, patay matapos mabungguan sang salakyan

ROXAS CITY – Patay ang 9 ka tuig nga bata matapos nabungguan sang pick-up nga salakyan sa Barangay Poblacion Ilawod, Panit-an, Capiz.

Ginkilala ang biktima kay Shella Mae Oqueña, residente sang nasambit man nga lugar.

Sa inisyal nga imbestigasyon, samtang ginasubay ni Louie Catalan, 28 anyos, residente sang Barangay Loctugan, Roxas City, ang nasambit nga lugar sakay sa iya nga salakyan, wala sini matalupangdan ang nagadalagan patabok nga biktima rason nga aksidente niya ini nga nabungguan.

Nag angkon sang magkatuhay nga kasamaran sa lawas ang biktima nga gintunaan sang iya nga kamatayon.

Gindala pa ang biktima sa ospital apang gindeklarar nga dead-on-arrival.