ROXAS CITY – Padayon nga ginabulong sa isa ka pribado nga ospital ang 9 ka tuig nga lalaki matapos aksidente nga matiruhan ang kaugalingon gamit ang calibre 38 nga armas luthang nga ginapanag-iyahan mismo sang iya amay.
Sandig sa inisyal nga imbestigasyon sang Panay Municipal Police Station, nga pasado alas kwatro sang hapon sang matabo ang amo nga insidente sa Barangay Pawa sang nasambit nga banwa.
Ginapahayag nga nagahampang ang biktima kaupod ang 11-anyos nga magulang apang nagsulod ini sa kwarto kun sa diin nahamtang ang armas-luthang sang ila amay.
Mahibaluan nga ginsaway pa ini sang iya magulang apang wala ini nagpamati.
Nakibot na lang ang utod sini nga may naglupok na, gani madasig nga nagsulod ini sa kwarto kag nakit-an nga duguon na ang amo nga biktima kag may igo sa agtang.
Gilayon nga ginsakwat sang utod ang biktima kag madasig nga ginpadangat sa ospital.
Sa karon, nagapadayun pa ang imbestigasyon sang mga kapulisan sa amo nga insidente.
