Siyam ka mga indibidwal ang nadakpan nga nagalapas sa curfew hour sa syudad sang Roxas.
Kalakip diri sanday Ian Chris Montaño sang Barangay Culasi, Roxas City, Krishna Mae Ado sang Barangay Dumolog, Roxas City, Earl Clavel kag Ken Altamia sang Barangay Cagay, Roxas City, Ina Perez sang Barangay Punta Tabuc, Roxas City, Maverick Bermejo, Arjay Depol, Rogelio Batuigas kag Erlan Pabalinas sang Barangay Punta Tabuc, Roxas City.
Sandig sa imbestigasyon sang Roxas City PNP nalabayan sang nagaroving nga mga barangay tanod kag on duty barangay kagawad nga si Darwin Bunda ang nahinambitan nga mga indibidwal nga yara pa sa Barangay Punta Tabuc bisan disoras na sang gab-i.
Gilayon nga ginturn-over ang mga curfew violators sa Roxas City PNP sa diin nagpatigayon sila sang community service bilang paglapas sa pagsulundan.
Nahibaluan nga istrikto nga ginapatuman ang curfew hour bangud sa pagtaas sang kaso sang COVID-19 sa syudad sang Roxas kag sa pagpaidalum na sa Roxas City sa Modified Enhanced Community Quarantine (MECQ).
