Indi magnubo sa siyam ka tawo ang napatay samtang 13 ang pilason matapos nga nagpang-luthang ang 13-anyos nga estudyante sa Kahramanmaras province southern Turkey.
Base sa imbestigasyon, nagsulod sa nasambit nga buluthuan ang Grade 8 student suspect dala ang mga pusil nga ginapatihan ginapanag-iyahan sang iya amay nga anay pulis.
Ginapahayag nga gilayon niya nga ginsulod ang duha ka hulot-klasehan kag ginpaulanan sang bala.
May bitbit nga lima ka armas kag pito ka magasin ang suspek, nga sang ulihi napatay man, apang indi pa maathag kon naghikog ini.
Suno sa mga otoridad, apat sa mga pilason ang yara na sa kritikal nga kondisyon, samtang anum naman ang yara sa intensive care unit.
Ginpahayag nga naglumpat man sa bintana sang eskwelahan ang pila sa mga estudyante agud makapalagyo sa pagpangluthang sa estudyante.
Ginpahayag man nga nadakpan sang mga otoridad ang amay sang suspek samtang nagapadayon ang imbestigasyon sa insidente.
Nahibaluan nga natabo ang pagpangluthang isa ka adlaw matapos ang isa pa ka shooting incident sa isa pa ka buluthuan sa probinsya sang Sanliurfa kun sa diin 16 ka tawo ang napilasan.
Nagpalab-ot man sang pagpakig-unong si Turkey President Recep Tayyip Erdogan kag nagsiling nga ang sin-o man nga mapamatud-an nga nagpabaya sa makakulugmat nga hitabo ang manabat.
