Indi makahimo sang aksyon ang gobernador kun wala sang request ang mga local chief executives para mapaidalum sa Modified Enhanced Community Quarantine (MECQ) ang ila nasakupan nga banwa.
Ini ang ginpahayag ni Capiz Governor Esteban Evan Contreras II angut sa request
ni Mayor Leodegario ‘’Jun’’ Labao Jr., bilang Presidente sang League of the Municipalities of the Philippines (LMP)Capiz chapter nga ginaduso mapaidalum sa MECQ ang kabanwahanan sa Capiz.
Suno sa amay sang probinsiya ang sarang lamang sini mahimo amo nga ma-endorso ang request sang isa ka LGU sa Regional Inter-Agency Task Force para ma-reclassify ang quarantine status sang isa ka lugar.
Apang 90% sang mga alkalde ang indi luyag nga maipaidalum sa MECQ ang ila banwa.
Suno sa gobernador nga ini ang nangin panindugan sang pila ka mga local chief executives sang mapakig-angutan sang damlag lang, bangud sa manubo nga kaso sang COVID-19 sa ila nasakupan nga lugar.
Gin-athag pa ni Governor Contreras nga indi madali nga ma-reclassify ang quarantine status sang isa ka lugar bangud may parameters nga ginapangita ang RIATF kasubong sa mataas nga datus sang COVID-19
Nagapati man ang gobernador nga nagapang duha duha ang iban nga mga alkalde nga ipaidalum sa MECQ ang ila banwa bangud sa responsibilidad nga ila abagahon kasubong sa ayuda nga dapat ihatag sang gobyerno sa mga pumuluyo nga madulaan sang trabaho.
Samtang agud istrikto nga mapatuman ang minimum health protocols sa kabaranggayan kinahanglan nga i-empower ang mga barangay tanod, BHW’s ,opisyales sa barangay bangud sa ini nga pamaagi matutukan ang kampanya sang gobyero batuk sa COVID-19.
