90K nga balor sang druga narekober sa drugbust operation sa isa ka boarding house

Roxas City- Nagdangat sa ginabulobanta P90,000 nga balor sang ginapatihan druga ang narekober sa ginkasa nga drug bust operation sang Anti Illegal Drugs Special Operations Task Group sang Roxas City PNP sa isa ka boarding house sa Burgos Ilawod, Barangay Tanque, Roxas City.

Arestado ang suspek nga ginkilala kay Vicente Fuentes alyas Itik, residente sang Barangay Cabugao, Panit-an, Capiz matapos nakigtransaksyon sa poseur buyer sa sulod sang iya gina rentahan nga hulot.

Suno kay Senior Inspector Efren Yu-ing, team leader sang AIDSOTG sang Roxas City PNP madugay na nga ginamonitor sang mga ini ang pagduso sang druga sa siyudad sang Roxas ni Fuentes apang tuman ka kilas. Gina verify pa sang mga ini kun nagsungka na sa Oplan Tokhang ang suspek.

Samtang sa exclusive interview sang Bombo Radyo kay Fuentes nag ako ini nga isa pa lamang ka bulan nga nagagamit kag nagaduso sang druga.

Magluwas sa anum ka sachets sang ginapatihan nga druga narekober man sa suspek ang pila ka drug paraphernalia, digital weighing scale kag P2,500 nga cash.
Sa karun nakahunong na ini sa karsel sang Roxas City PNP kag natalana pasakaan sang panumbungon nga paglapas sa Republic Act 9165 ukon Comprehensive Dangerous Drugs Act of 2002.